قصيدة ناصر الفراعنة:ياوقتنا

قصيدة (ياوقتنا اللي صار فيه الذنب راس)
إحدى عجائب شاعر مضر
هي من فرعونيات شاعرنا الكبير
حِكم ، فخر ، وصف الناقة ، ..........

ياوقتنا اللـي صـار فيـه الذنـب راس
مواخـر الأذنـاب تسجـد لـهـا روس
البوم ياطـى فـي بطـن كـل قرنـاس
والذيـب عدنـه عـن الجمـة تـيـوس
ياوقـت ياثالـم شبـا كــل عـبـاس
ياخالـقٍ روس الأسنـة مـن الخـوص
خليتـنـا فــرعٍ وخليتـهـم ســاس
خليتهـم ركـبٍ وحنـا لهـم عــوص
ناسٍ ترمـم عظمهـا مـن لحـم نـاس
وكوسٍ تصافق خمرها مـن ورى كـوس
يا وقت أباري لك علـى قـب الأفـراس
لاشـك ماتشفـق علـى قلـب فاعـوس
وأنـا اللـذي مابيـن مجهـم ومغـلاس
مابيـن أرضٍ وأرض هايـم ونـاطـوس
لاقاضـمٍ حـبـه ولاشــاربٍ كــاس
ولانيب مـن عفريتـة الجـن ممسـوس
لاشـك هـمٍ يـودع الـراس يحـتـاس
كنـه يبرشـم ناظـر العيـن دانــوس
مبطي لاجاء الطيب نتنومـس تنومـاس
واليـوم لاجانـا تـقـل قـاطـعٍ روس
وكل السبب وضحاً علـى عنقهـا فـاس
والسـر لاواضـح ولاهـوب مدسـوس
ماننشـد الوجـه المعفـن ليـا خــاس
ونشره على الطيب إلى صـار داسـوس
ياحيـف يالباسـة الجـوخ والـطـاس
شرابكـم مـن علقـم الـذل محـيـوس
ومن رام له مجدٍ علـى ربـط الأسيـاس
والله ان يمـر القبـر صيـرٍ ومغمـوس
المجد مايصلح علـى الرخـم الأنجـاس
الا علـى غمـرٍ ينـوس الخطـر نـوس
وماكل من يدلـج علـى اليـم غطـاس
ولاكل من ركب علـى الخيـل سنعـوس
والله يـالـولا إخـتـلافٍ بالأجـنـاس
ماعاد نفـرق بيـن فـارس ومفـروس
وياللي حقرت النفس والمكسـب طفـاس
لعن الله آبـو محجـر النفـس بطفـوس
ومن رضي لأجل القرش عيشته منخـاس
.......عرضه لو يبـوس القـدم بـوس
سواة نـاسٍٍ بالشـرف مالهـا أمـراس
تسحب مشالحهـا علـى غيـر نامـوس
والله يالعيـشـة منـظـف وكـنــاس
آخيـر بالعيشـة بهـا الـذل متـروس
وياغرفـةٍ فالسطـح فيـران وبـسـاس
ولاقصـرٍ أساسـه مدوخـل ومنخـوس
وسهري على سطحٍ من الشوك محسـاس
أخير من نومي علـى القطـن مدعـوس
وياهملجة عيني علـى المـوت بنعـاس
و لافتحت عيونـي علـى كـل دعبـوس
ولو هو ضحك لي وسنه أبيض من الماس
قلبه كما حـبٍّ رعـاه أسـود السـوس
نذلٍ لو آسـودس لـه الطيـب سـوداس
مايذكـره لـو بيـن أذانيـه نـاقـوس
ف ياللي تمردس طيبهـا فيـه مـرداس
ماتطلـع الصبخـة ثمـر كـل مغـروس
أكبـر شبـه للـي بهـا صـار غـراس
خبلٍ يشد السـرج مـن فـوق جامـوس
فـيالله يالمعـبـود ياجـالـي الـبـاس
إفـرج لمنهـو تالـي الوقـت مدعـوس
عقـب المعـزة تحـت الأقـدام ينـداس
كنه عن العالم نقـص كـف وضـروس
إن قلت أببعـد وش عليَّـه مـن النـاس
تحرشوا بـي لـو ورى حـد غرطـوس
وإن قلت أبقرب مثـل عنتـر وجسـاس
مامعـي مايفتكنـي لـو طـرف مـوس
إرجع ياسيفي خلاف وإطلـع ياقرطـاس
هـذا زمــانٍ للقراطـيـس مــدروس
أقفى زمـان إخـوان شامـه وعـرواس
وأقبل زمان إخـوان سوسـن وفـردوس
راحـوا عيـال المشمشـة والأنـانـاس
بالرزق والا إنَّـا نقـوس الفقـر قـوس
فيا راكبٍ مـن نقـوة الهجـن عرمـاس
مـن دار سلطـان السواحيـل قابـوس
ماكنـه إلا الزيـن مدقـوق الألـعـاس
يبرى لهـا ذيـلٍ تقـل ريـش طـاووس
أم العيـون اللـي تقـل لـون مدبـاس
حمـرٍ تخاتـل كنهـا عيـن جاسـوس
والخشـم منحـول الرواقيـن مـدمـاس
كنـه ليـا رد النسـم حامـي جمـوس
والإذن لاقامـت تمهـلـس تمـهـلاس
بيـرق عقيـد ومقـدم الخيـل كـردوس
قصيـرة الواحـد ولاهـيـب معـبـاس
طويلـة الإثنـيـن ذيــلٍ ونسـنـوس
تلقى مواطـي خفهـا فـوق الأطعـاس
تشبـه لسمـراً علمـت فوقهـا الفـوس
وخـفٍّ ليـا قـام يتطعمـس تطعمـاس
كنه بمرهـوفٍ مـن الشلـف محسـوس
ووركٍ تحـذف بـه تقـل ورك إيـنـاس
لاسمع الـه قبـلٍ غـدى تقـل منكـوس
والبطـن مهيـافٍ تقـل مابـه أرمـاس
والظهر صلـبٍ منحنـي كنـه القـوس
والجلـد مـن لكـز العراقيـب حسـاس
ومن وشة العصفـور فالجـو محسـوس
خطـرٍ لـو إنـه هبهـا ريـح نسنـاس
تدفي كما تدفـي مـن الظلـه شمـوس
إليـا نسـت عرقـوب ركابهـا أونـاس
راغت تقل غافي سمـع حـس نـادوس
تكـرم عـن اللـي زينوهـا بالأطيـاس
ولادوروا فــي هـــلال وتـــروس
اليـا اسهلـت يازيـن هـاك التمريـاس
كنها علـى ثلـجٍ وفـي خفهـا لبـوس
واليا أوعرت عبدٍ سمع حـس مـرواس
قام يتخشـع مومـي الـراس منكـوس
تلفـي علـى لباسـة الحمـر الأدقـاس
شمّـر هـل العـادات ريـس ومريـوس
ياماثنـوا عـن نايـد الــدار نـكـاس
وياما حدوا من صفـوة القـوم ناكـوس
منصى حلو في مجلسه طرب الإحسـاس
ماهـوب قفـرٍ مدبـر القـاع ميـبـوس
وانصى لنا برجس علـى كـور مقـواس
راعي الشداد اللـي للأجنـاب مركـوس
أشكي لهم وقتٍ على شـذب الأضـراس
فصَّـل عليَّـه دبـرة الشيـن ملـبـوس
وأنـا اللـذي ماشاقنـي درب الأدنـاس
وأشوم عن طعمة عسـل كـل نخسـوس
كـم دايـسٍ مــاداس شــيٍ إلا داس
وغيـره يـدوس ولـو مـاوده يـدوس
مالوم أهـل جـوخٍ تمـدوس تمـدواس
كلٍ حفـر لـه تالـي الوقـت دهلـوس
ومن لايحـط لمقضـب البـاب تربـاس
يصبـر علـى ماجـاه حيـه ولسلـوس
للجـب حـفـارٍ وللـحـب مـهـراس
ومن شد عقب شـوي تلقـاه مهـروس
واحالي اللـي ماعثـت فيـه الأرمـاس
ياكـود ممـا شـاف حاضـر ورامـوس
ما قول كن قلبي علـى الضـو محمـاس
متعـدي قولـة علـى الضـو محمـوس
كني ليـا حـل أسـود الليـل عسـاس
بين أنجمٍ بيـضٍ تخافـق تقـل طـوس
أهيـم فالدنيـا وأنـا مفلـس إفــلاس
من عاليـة حايـل إلـى نـازل سـدوس
وترى الفضا لو هـو وسيـعٍ ومشـواس
أضيق على الملتاع مـن خـرم دبـوس
ملتـاع مالوعـه أبـو عـود مـيـاس
ملتاع مـن جـور الليالـي ومطسـوس
ماعـاد يطربنـي مـع القـوم مجـلاس
ولاعاد يقضبنـي عـن الهملـه جلـوس
لو صابني ماصـاب ابودبـاس بدبـاس
مابـت ليـلٍ ساهـر الطـرف منحـوس
روابــعٍ فالقـلـب جـنـدٍ وحــراس
توقـد بقلبـي قـاد نــارٍ بفـانـوس
وكشف الروابـع قبـل توليـع الأكبـاس
راعيه لاشب أشهـب الصبـح مكبـوس
ياقـوم ياقولـة شجـيـعٍ وعنـطـاس
ياماغـدى فـي جمـة البيـر عنطـوس
عشريـن أقيسهـا علـى كـل مقيـاس
من بعد عشرينٍ علـى العمـر كابـوس
ماخـذت تعلـيـم الليـالـي بـكـراس
أخذت مـن سـود الدهـر جملـة دروس
كيف الوفاء شان الوهـد مالـه أمسـاس
وكيف المراجل تشتـرى اليـوم بفلـوس
من كثر ماشفـت الـوزا قطـع أنفـاس
أصبحـت بايـح سـد والمـخ ملحـوس
صبيت لي في مضـرب العـاج بقيـاس
ذن أشقحٍ بالضـارب الصلـب منسـوس
أبيه يجلي لـي عـن الخاطـر إعمـاس
لاشـك مـن مـرٍ علـى مـر مكبـوس
أغضيت عيني ساعةٍ وأرجـس إرجـاس
قلـبٍ ورى حـدب المعاليـق مرجـوس
في خايـعٍ صبحـه تخرمـس تخرمـاس
وليلـه كمـا حـم الغرابيـب خرمـوس
ياوي حلم أضرب له أخمـاس بأسـداس
أقلبـه مثلـوثٍ وألاقـيـه مـسـدوس
فزيت مثل اللي لمس سلـك مـن مـاس
به كهرباء من ضغط عالـي ومحسـوس
فزيـت واللـي فزنـي فـز هـوجـاس
وعزي لمـن رده عـن النـوم هاجـوس
وكـل السبـب زولٍ لفانـي بــلا راس
شفتـه ومـن خلفـه رجـالٍ بـلا روس
يحمـل معـاه كتيِّـبٍ تـقـل نـبـراس
أولـه واضـح ميـر تاليـه مطـمـوس
في عينه اليمنـى رجـاً يشبـه اليـاس
وفي عينه اليسـرى للأحـزان قامـوس
يلحس ذراعـه بأسفـل الريـع لحـاس
ويمسح حـذاه بعالـي الريـع دنفـوس
لـه ملـةٍ تجهـل نـبـي الله الـيـاس
الصبح مسلـم وآخـر الليـل هنـدوس
وعجزت أفسر غامـض الحلـم يانـاس
تصغر له نفـوسٍ وتكبـر لـه نفـوس